Менавіта так вучні нашай школы сустракалі маладога пісьменніка, аўтара  рамана-фэнтэзі для падлеткаў “Сем камянёў” Аляксея Шэіна: ведалі, што  яго імя ўваходзіць у ТОП-10  самых чытаемых аўтараў Беларусі , а яго кніга—у ТОП-3 самых прадаваемых.

На пачатку сустрэчы пісьменнік  грунтоўна пазнаёміў прысутных з гісторыяй фэнтэзі ў сусветнай літаратуры. Адна за адной  ажывалі перад вачыма вучняў сцэны са знакамітых твораў К.С.Льюіса “Хронікі Нарніі”, Дж.Р.Толкіна “Уладар пярсцёнкаў”,  К.Пааліні “Эрагон.” Адкрыццём для дзяцей сталі назвы беларускіх  твораў, створаных у жанры фэнтэзі:  “Лабірынты” В.Ластоўскага,  “Адваротны бок люстра” К.Шталенковай.

“Гэтая прыгодніцкая літаратура, —зазначыў аўтар, —  асабліва творы К.С.Льюіса,  натхнілі мяне на напісанне ўласнага рамана-фэнтэзі”. У маладога пісьменніка была і яшчэ адна прычына звярнуцца да  жанру фэнтэзі: перачытаўшы  са сваімі маленькімі сынамі ўсе  беларускія дзіцячыя кнігі  ў бібліятэцы, ён убачыў недахоп прыгодніцкай літаратуры для падлеткаў.

Тры з паловай гады  майстэрствам і сэрцам пісаўся  гэты раман. Прывабліва зіхацяць на вокладцы  кнігі выявы сямі каштоўных камянёў. І назва, і вокладка кнігі невыпадковыя.  Яшчэ ў школе Аляксей наведваў геалагічны гурток і  зацікавіўся гісторыяй камянёў, нават сабраў невялічкую прыватную калекцыю. Яго юнацкія захапленні   знайшлі адлюстраванне  і ў змесце рамана. Афармленне  малюнкаў  у тэксце належаць мастаку Раману Суставу, для якога гэта быў першы досвед працы над менавіта беларускамоўнай кнігай.  Імя мастака-графіка вядома аматарам  камп’ютарнай гульні “Танчыкі”.

Падзяліўся аўтар і яшчэ адной навіной: літаральна некалькі дзён таму  буктрэйлер кнігі "Сем камянёў" стаў пераможцам фестывалю мабільнага кіно velcom SmartFilm у намінацыі "Лепшы альтэрнатыўны буктрэйлер".

У ходзе сустрэчы Аляксей правёў віктарыну  з уручэннем прызоў тым, хто першы правільна адказваў на пытанні. Дзеці назаўсёды запомняць гісторыю паходжання слоў “імбрык” і “гарбата”, узрост Уладзіміра Караткевіча падчас напісання рамана  “Дзікае паляванне караля Стаха”, зразумеюць, што “кожны чалавек на Зямлі адметны і прызначаны для  нечага свайго”.

На развітанне ўсе жадаючыя маглі зрабіць фота з аўтарам і атрымаць на памяць аўтограф.  Дарослыя і дзеці дзякавалі аўтару апладысментамі, зачараваныя непаўторнай атмасферай яднання  рэальнасці і фэнтэзі.

 Наталля Сідарава, настаўнік беларускай мовы і літаратуры Залескага яслі-сада-сярэдняй школы