Партрэт адметны ў кожнага мястэчка:
Вось тут Агінскі жыў і працаваў.
На ўлонні гэтым, дзе лясок, дзе рэчка,
Музычныя шэдэўры ён ствараў.
Сышлі ў нябыт гады, а то й стагоддзі,
Сучасны век, і на дварэ – прагрэс,
Але, нягледзячы на час, застаўся ў модзе
Напісаны Агінскім “Паланэз”…

Гэтыя радкі з твора, прысвечанага Залессю і яго слаўнаму колішняму ўладару Міхалу Клеафасу Агінскаму, падарыла ўдзельнікам святочнай імпрэзы паэтэса з Глыбокага Галіна Сутула. 

Шмат цёплых слоў, віншаванняў і шчырых зычанняў прагучала ў святочны дзень з імправізаванай сцэны на тэрыторыі сядзібы побач з музеем слыннага кампазітара ад прадстаўнікоў раённай улады і шматлікіх гасцей. На слаўны 325-гадовы юбілей вёскі Залессе завіталі госці не толькі з розных куткоў Беларусі, але і з-за мяжы.

Прадстаўнікі польскай вёскі Залессе: Войцех Шыменэк, Тамаш Шэвчык, войт Залескай гміны Ян Сікора.

Старшыня сельсавета Зянон Грышкевіч, як сапраўдны гаспадар, узяў на сябе ролю вядучага ўрачыстасцей. Аповед пра гісторыю вёскі папоўніўся багатым спісам выдатных прашчураў і іх нашчадкаў, а таксама тых асоб, чый лёс скрыжаваўся з лёсам Залесся. Згадалі на свяце сама-дзейнага скульптара Аляксандра Жываева, мастака-педагога Паўла Южыка, былога старшыню калгаса “Чырвоны партызан” Сяргея Грышана, старэйшую ўдзельніцу народнага тэатра лялек “Батлейка” Галіну Рыжэвіч, доктара філалагічных навук Арсеня Ліса, беларускага пісьменніка Паўла Савоську і многіх іншых. Сярод пералічаных — чыгуначнікі, юрысты, урачы, дзяржаўныя служачыя, настаўнікі, мастакі. Многія з іх прыехалі на свята. Напрыклад, Уладзімір Развадоўскі, які цяпер жыве ў Глыбокім на Віцебшчыне, завітаў не адзін, а разам з народным хорам “Маналіт”.

Старшыня Залескага сельсавета Глыбоцкага раёна Віцебскай вобласці Барыс Заяц і старшыня Залескага сельсавета Зянон Грышкевіч падпісалі дамову аб супрацоўніцтве.

Ад імя знакамітых ураджэнцаў залескай зямлі выступіў Пётр Южык, які падзяліўся сваімі ўспамінамі пра па-дзеі былых часоў і пра людзей, чыімі намаганнямі адбудоўвалася і прыгажэла Залессе. Музыкант, таленавіты баяніст з Маладзечна Авенір Дудко, як пастаянны госць на залескіх імпрэзах, падарыў чарговы музычны сувенір сваім колішнім землякам з малой радзімы.

На выкладзенае ў інтэрнэце запрашэнне да ўсіх жыхароў і кіраўнікоў вёсак з аднайменнай назвай, на жаль, адгукнуліся нямногія. Тым не менш сярод гасцей была дэлегацыя з польскага Залесся на чале з войтам гміны Янам Сікорай. Яго намеснік Тамаш Шэвчык расказаў, што паны ўпершыню на Залескай зямлі і з вялікім нецярпеннем чакаюць моманту, каб наведаць палац-музей М. К. Агінскага.

Мастакі, удзельнікі пленэра ў Залессі са сваім падарункам для музея М. К. Агінскага.

З літоўскага Грыгішкеса прыехалі ўдзельнікі фальклорнага калектыву “Шальцінорыс” (“Крынічанька”). Яго кіраўніца Марына Бругзулене расказала, што ў рэпертуары ансамбля аўтэнтычныя творы музычнай спадчыны Аўкштанціі, Жэмайціі, Дзукіі. Для музычнага суправаджэння артысты выкарыстоўваюць старажытныя інструменты, а таксама старадаўнія бытавыя прылады. Калектыў пастаянна ўдзельнічае ў разнастайных фэстах і конкурсах фальклору. Свой невялічкі гарадок Грыгішкес, які ўвайшоў у межы Вільнюса, госці называюць літоўскім Ваціканам або горадам у горадзе.

Другі раз выступаў на залескай імпрэзе калектыў з Латвіі – ансамбль народнай музыкі “Купалінка”. Радавалі і цешылі слых іншыя ўдзельнікі канцэртнай праграмы.

Залескія прыгажуні прэзентуюць мясцовыя прысмакі.

Шырокі асартымент вырабаў прадставілі рамеснікі, майстры народнай творчасці. Сваю прадукцыю прапаноўвалі залесцы на традыцыйных падворках. “Залескія берагіні” сельскага Дома культуры і “Залеская карчма” жаночай грамадскай арганізацыі “Сяльчанка” зазывалі гасцей імпрэзамі і апетытнымі пахамі здобы. Уміг раскупілі смачныя хатнія прысмакі, якімі гандлявалі Людміла Гружэўская, Ганна Мейсак, Вольга Аўласевіч. Удзельнікі святочнага кірмашу падарылі ў знак удзячнасці гаспадарам каштоўныя сувеніры. Усе яны, па словах дырэктара музея-сядзібы М. К. Агінскага Людмілы Градзіцкай, знойдуць сваё месца ў экспазіцыі.

Краязнаўчую і гістарычную літаратуру прапаноўвалі на свяце супрацоўнікі цэнтральнай раённай бібліятэкі.

Ад Саюза мастакоў Беларусі перадалі свой падарунак творцы, якія напярэдадні бралі ўдзел у пленэры, што ладзіўся ў Залескай сядзібе пры падтрымцы маладзечанскага фонду “Нашчадкі М. К. Агінскага”. Мікола Купава, падводзячы вынік пленэра, адзначыў, што многія мастакі мелі вялікае задавальненне і натхніліся на стварэнне цыклаў карцін у розных жанрах, аб’яднаных адной ідэяй – уплыў музычнай творчасці Міхала Клеафаса Агінскага на розныя віды мастацтва. А маладзечанскі мастак Мікола Аўчыннікаў прызнаўся, што захоўвае і сёння карціну з выявай залескага палаца, якая выстаўлялася ажно ў далёкім 1977 годзе.

Ала КЛЕМЯНОК, "СШ"
Фота аўтара