Залескія чараўніцы
Ніна Кенька (злева) і Наталля Логач
У кожнага чалавека ёсць месца, куды яму прыемна прыходзіць. Гэта могуць быць установы культуры ці спартыўныя залы, тэатр або музей і г. д. Хачу вам нагадаць яшчэ пра адно цікавае месца нашага краю, дзе вы можаце з карысцю праводзіць свой вольны час. Гэта раённы Дом рамёстваў, які знаходзіцца ў цэнтры Залесся. І хаця вонкавы выгляд будынка не вельмі прываблівы, у пакоях захоўваюцца і ствараюцца рукамі таленавітых майстрых сапраўдныя цуды.
Каралевай саламяных шэдэўраў называем мы паміж сабой Наталлю Логач, якая працуе метадыстам і майстрам па саломапляценні. Госці, што наведваюцца да нас, заўжды ў захапленні ад прыгожых рэчаў, створаных залатымі рукамі майстрыхі. Наталля Віктараўна вядзе гурток “Саламяныя дзівосы” для дарослых, дзе можна набыць веды і папрактыкавацца ў тэхніцы саломапляцення, нават стварыць сваімі рукамі прыгожы сувенір.
Наогул, у нашым аграгарадку вельмі шмат актыўных, таленавітых і творчых людзей. Асабліва сярод жаночай паловы насельніцтва. Жанчыны і дзяўчаткі займаюцца бісерапляценнем, вышыўкай, вязаннем, ствараюць сапраўдныя цуды з паперы і разнайстайных матэрыялаў. Адна з такіх мясцовых аматарак творчасці Ніна Кенька. У яе можна многаму павучыцца. А вучыцца, як вядома, ніколі не позна. Таму да яе і ідуць за парадай ці падказкай аматары вязання. Цудоўныя карункі ствараюць наведвальніцы гуртка, якім кіруе Ніна Уладзіміраўна. Вялікае шчасце працаваць і пераймаць вопыт у сапраўдных чараўніц, якія самі распрацоўваюць ідэю і самі ж увасабляюць яе ў жыццё.
Творчы дуэт Наталлі Логач і Ніны Кенькі стварае сумесныя брэндавыя сувеніры, арыгінальныя і запатрабаваныя наведвальнікамі Залесся.
У планах нашай установы культуры правядзенне творчых сустрэч, пасяджэнняў аматарскіх аб’яднанняў, выстаў аўтарскіх работ умельцаў. Будзем рады запрасіць да нас усіх, хто цікавіцца народнымі рамёствамі.
