«Анёл у тваім сэрцы»
Пад такой назвай у гісторыка-краязнаўчым музеі працуе дабрачынная выстава. Грошы, якія назбіраюць ад наведвальнікаў выставы, пойдуць у прытулак сацыяльна-педагагічнага цэнтра.
Трыццаць навучэнцаў мастацкага аддзялення школы мастацтваў імя Міхала Клеафаса Агінскага прадставілі тут свае работы. Жывапіс, графіка, выцінанка. Як заўважыла настаўніца школы Марына Пахомава, дзеці стараліся ўкласці ў работы ўсю сваю дабрыню, энергію, фантазію, цярпенне і працу.
- Такі дабрачынны праект мы арганізоўваем другі год запар, — зазначыла загадчыца мастацкага аддзялення школы Святлана Дзенісенка. – Мы бываем у прытулку СПЦ, праводзім майстар-класы. Ведаем, які няпросты лёс у гэтых дзяцей, таму вырашылі вось такім чынам іх падтрымаць.
