На працягу Вялікага посту мы імкнуліся дапамагчы вам крыху разнастаіць меню вашай сям’і, публікуючы простыя і сытныя посныя рэцэпты. Спадзяёмся, што рэцэпты спатрэбіліся і застануцца назаўсёды на вашым стале.

Вялікі пост заканчваецца, набліжаецца свята Вялікадня. У сям’і пачынае «кіпець» праца. Трэба не толькі прымаць удзел у рэкалекцыях, Крыжовым шляху, Песнях жальбы, літургіі Пасхальнага трыдуума. Гаспадыням у гэтыя дні дадаецца працы, неабходна ўсё добра спланаваць, каб хапіла часу на падрыхтоўку да свята, каб, стоячы на Пасхальнай вігіліі або рэзурэкцыі, не думаць пра тое, што яшчэ нешта не зроблена, нешта не прыгатавана. Да навядзення парадку ў доме можна заахвоціць дамачадцаў.

Вядома, цяпер кіёскі і паліцы вабяць каляровымі часопісамі і кнігамі, прысвечанымі кулінарыі, амаль у кожным доме ёсць інтэрнэт, з дапамогаю якога можна адшукаць любы рэцэпт, усё ж мы вырашылі даць вам некаторыя правераныя рэцэпты і некаторыя парады пра тое, як пафарбаваць і ўпрыгожыць велікодныя яйкі. Час яшчэ ёсць, каб набыць кнігу Марыны Новікавай «Пасха. Традиционные и современные блюда к праздничному столу» («Конфидо», Минск, 2013).

Выданне можна набыць у краме «Духоўная кніга» (Мінск, вул. Багдановіча, 25, тэл. +375 (17) 2931753, магчыма высылка па пошце). У гэтай кнізе, апрача традыцыйных і новых рэцэптаў, вы знойдзеце карысныя парады. Напрыклад, як дэкараваць велікодныя яйкі. Дарэчы, дэкараваннем можна заняцца усёй сям’ёй, а гатаваць па падрабязных рэцэптах Марыны Новікавай змогуць не толькі жанчыны і дзяўчаты, але з задавальненнем далучацца да гэтага творчага працэсу мужчыны і хлопцы.

Парады з кнігі Марыны Новікавай «Пасха. Традиционные и современные блюда к праздничному столу»

Велікодныя яйкі

Традыцыйна яйкі фарбуюць у цыбулевым шалупінні. Ад яе колькасці залежыць інтэнсіўнасць колеру пафарбаваных яек — ад аранжава-бежавага да насычанага бура-чырвонага.

Шалупінне жоўтай рэпчатай цыбулі (5–10 жменяў) замачыць на ноч. Яйкі перад афарбоўкаю пажадана памыць мыльным растворам або працерці воцатам, каб больш раўнамерна афарбаваць.

Для нанясення ўзору можна прыкласці галінкі або лісцікі раслінаў. Пасля, змясціўшы яйко ў капрон або бінт (у адзін слой), моцна завязаць канцы ніткаю. Для атрымання карункавага ўзору можна загарнуць яйко ў карункі, а для атрымання палосак — абкруціць ніткамі.

Прыгатаваныя такім чынам яйкі пакласці ў каструлю з шалупіннем, зварыць у крутую (10–15 хвілінаў на малым агні) і пакінуць у шалупінні, пакуль не астынуць. Каб атрымаць больш насычаны колер, можна пакінуць яйкі ў шалупінні на некалькі гадзінаў. Пасля таго, як пафарбаваныя яйкі абсохнуць, можна нацерці іх алеем, каб яны блішчалі.

Шалупінне фіялетавай цыбулі пафарбуе яйкі ў бура-чорны колер.

Каб пафарбаваць яйкі ў сіні колер, неабходна заліць вадою парэзаную на вялікія кавалкі чырвонакачанную капусту (1 качан), дадаць 3–5 л. солі (у залежнасці ад колькасці яек) і варыць 15–20 хвілінаў, працадзіць. Дадаць да атрыманага адвару 3–5 ст. л. воцату, фарбаваць загадзя звараныя яйкі, пакінуўшы іх у адвары на 15–30 хвілінаў, каб атрымаўся блакітны колер або на некалькі гадзінаў — для сіняга колеру.

Каб атрымаць карычневы колер, адварыць яйкі ў вельмі моцнай заварцы чорнай гарбаты (8–10 пакецікаў на шклянку вады) з 3–5 ст. л. солі. Дадаць 3 ст. л. воцату, пакінуць яйкі ў заварніку на некалькі гадзінаў. У карычневы колер пафарбуе яйкі і насычаны адвар з 2–4 буракоў, да якога дададзены соль і воцат.

Каб атрымаць жоўты колер, неабходна адварыць яйкі з 3 ст. л. куркумы або 1–2 ч. л. шафрана і 3–5 ст. л. солі. Дадаць 3–5 ст. л. воцату, пакінуць яйкі астываць у растворы да набыцця жаданага колеру, прамыць, высушыць.

Каб атрымаць зялёны колер, неабходна пафарбаваць яйкі ў куркуме і шафране, а пасля трымаць у адвары з чырвонай капусты да атрымання жаданага колеру.

Мясны рулет з сакрэтам

На 8–10 порцый:

Па 500 г. фаршу з свініны, ялавічыны, цяляціны (або індычкі)
4 зубкі часнаку
1/2 шклянкі дробна парэзанай пятрушкі
3 яйкі
5 ст. л. кетчупу
3/4 шклянкі паніровачных сухароў
1 шклянка цёртага жоўтага сыру
5 тонкіх і доўгіх звараных карэнняў пятрушкі або морквы
4 звараныя ў крутую яйкі
2 ч. л. молатага чорнага перцу
Старанна перамяшаць пакрышаны часнок, пятрушку, сырыя яйкі, кетчуп, сухары, сыр, соль і перац, пасля дадаць мясны фарш і яшчэ раз перамяшаць.

Выкласці палову фаршу на фольгу. Пакласці пасярэдзіне 3 карэнні пятрушкі: адзін з іх — ніжэй, крыху ўціснуўшы ў фарш, наступныя два — крыху вышэй, чаргуючы тонкі і тоўстыя канцы. Паміж карэннямі паставіць у рад яйкі, зрэзаўшы папярэдне шляпкі. На яйкі пакласці два карані, што засталіся, і накрыць усё другой паловай фаршу. Сфармаваць рулет, злёгку прыціскаючы з усіх бакоў, каб замацаваць начынку, закруціць рулет у фольгу.

Запякаць, паклаўшы ў форму, у нагрэтай да 200оС духоўцы 1–1,5 гадзіны. Праз 30 хвілінаў ад пачатку запякання фольгу раскрыць, каб рулет зарумяніўся.

Хатняя белая каўбаса

1кг тлустай свініны без сухажылля (грудзінка, шыя, карэйка або лапатка)
500 г. мяса птушкі (курыныя ножкі або індычка)
па 1/2 ч. л. молатага суш. каляндры, чабару
6–8 пакрышаных зубкоў часнаку
1 ч. л. молатага белага (або чорнага) перцу
па 3 ч. л. солі, маярану і зеляніны пятрушкі (па жаданні)
2–3 ст. л. гарэлкі або каньяку
каля 250 г. каўбасных абалонак

Мяса парэзаць на кавалкі, перакруціць на фарш, дадаць гарэлку і ? шклянкі ледзяной вады (або мелка паскрышанага ільду) або ледзянога белага сухога віна. Хутка і старанна вымешаць разам з прыправамі, паставіць на некалькі гадзінаў у халадзільнік, каб мяса прапіталася прыправамі. Ледзяная вада або віно дадаюцца для таго, каб тлушч у фаршы не плавіўся падчас вымешвання, дзякуючы гэтаму каўбаса будзе мяккаю і сакавітаю.

Вымытыя каўбасныя абалонкі надзець на насадку для каўбасы ў мясарубцы (або камбайне), пакінуўшы кончык даўжынёю каля 10 см. На маленькай хуткасці раўнамерна і няшчыльна напаўняць абалонкі фаршам. Ужо напоўненыя фаршам абалонкі перакручваць кожныя 10–15 см, робячы поўны абарот — то па гадзіннікавай стрэлцы, то супраць — і такім чынам фармаваць каўбаскі. Месцы перакручвання можна дадаткова завязаць тонкім шпагатам. Пакласці каўбаскі ў халадзільнік, а пасля разрэзаць.

Перад варкаю пракалоць каўбаскі ў некалькіх месцах, варыць каля 10–20 хвілінаў або гатаваць на пары.

Парада

Калі няма абалонак, то можна скатаць з фаршу шарыкі або сфармаваць каўбаскі, а пасля падсмажыць або адвырыць.

Часопіс "Ave Maria"