Месца сустрэчы — Смаргонская бібліятэка
Бібліятэкар бібліёбуса Наталля КУРМЕЛЬ, бібліятэкар Наталля ШЫНКЕВІЧ, мастак Святлана МАГЕР, галоўны бібліёграф Алена РАМАНОВІЧ
Нядаўна на форуме аднаго з інтэрнэт-парталаў распачалася спрэчка аб страце прыцягальнасці сучаснай бібліятэкі. Як нейкае ноу-хау, прыводзілася прапанова маскоўскага кнігавыдаўца Барыса Купрыянава па ператварэнні бібліятэк у месцы для сустрэч, для камунікацый, для правядзення рознага роду мерапрыемстваў.
Не без гонару я адзначыла пра сябе, што ў нашым невялічкім гарадку такая практыка існавала, здаецца, заўжды, колькі я сябе помню. Нават у часы самага глыбокага палітычнага і эканамічнага крызісаў работнікі бібліятэк захоўвалі вернасць сваёй прафесіі і не проста заставаліся “вартаўнікамі” кнігі, але і актыўнымі яе прапагандыстамі, асветнікамі на глебе культурнай спадчыны, распаўсюджвальнікамі “добрага, светлага, вечнага”. Яны выхоўвалі і выхоўваюць свайго чытача з маленства, знаходзяць падыход да аматараў чытання розных пакаленняў і розных сацыяльных колаў. Ці не таму літаральна ў кожнай, нават самай маленькай вясковай бібліятэцы, існуе свая лучнасць кнігалюбаў або клуб, або аматарскае аб’яднанне па інтарэсах. Масавая работа праводзіцца з улікам значных падзей у жыцці рэгіёна і краіны, а таксама з улікам пажаданняў самых бліжэйшых і актыўнейшых сяброў.
У Смаргонскім раёне працуе сёння 21 бібліятэчная ўстанова, з якіх 15 – у сельскай мясцовасці. Да жыхароў маланаселеных і аддаленых вёсак выязджае бібліёбус – спецыяльная перасоўная бібліятэка-аўтобус, і чатыры разы на тыдзень кіруецца ў адну з 40 аддаленых вёсачак.
Інавацыі ў рабоце бібліятэк – эфектыўны метад мадэрнізацыі традыцыйных формаў бібліятэчнага абслугоўвання. Папулярнай формай работы сталі мерапрыемствы пад адкрытым небам, выезды на прадпрыемствы і ў навучальныя ўстановы, сустрэчы з літаратарамі, мастакамі, творчымі асобамі розных прафесій. Частымі гасцямі Смаргоншчыны бываюць сталічныя пісьменнікі і паэты. Вось і сёлета ў Войстаме адбылася сустрэча з Генадзем Пашковым і творчай групай мінскіх літаратараў. “Там, дзе Беларусь мая, там і я” – пад такой назвай прайшла цікавая імпрэза з Міхасём Пазняковым у Смаргоні. Знакаміты скульптар Уладзімір Церабун стаў героем вечарыны “Лёс, падараваны мастацтву”.
Шмат гадоў пры цэнтральнай бібліятэцы працуе літаратурна-музычная гасцёўня “Сустрэчы”, на пасяджэннях якой пабывалі цікавыя творцы, людзі мастацтва, літаратары, краязнаўцы. Наогул жа, у межах соцыякультурнай дзейнасці ў бібліятэках сістэмы працуе 26 аматарскіх аб’яднанняў і клубаў па інтарэсах разнастайных напрамкаў, чыя дзейнасць накіравана на захаванне і прапаганду культурна-гістарычнай спадчыны рэгіёна, вывучэнне народных традыцый, помнікаў прыроды.
Вялікая ўвага надаецца рабоце з юным чытачом. У гарадской бібліятэцы №2 ладзіцца так званы інфармацыйны кірмаш з цікавымі і карыснымі ідэямі і кансультацыямі спецыялістаў. Пры многіх бібліятэках плённа працуюць на дабрачынных пачатках самадзейныя гурткі. Напрыклад, музей вясковага побыту ў Залескай бібліятэцы, дзякуючы якому ўтварыўся цэнтр этнакультурнай асветы. А ў Кушлянскай, Сасноўскай, Крэўскай бібліятэках створаны этнакультурныя пакоі і куткі. У Вішнеўскай бібліятэцы на працягу многіх гадоў юныя чытачы з задавальненнем ладзяць спектаклі тэатра лялек. Сельскія бібліятэкі пастаянна праводзяць святочныя мерапрыемствы, разнастайныя конкурсы, выставы, акцыі, удзел у якіх спрыяе стымуляванню бібліятэчнай работы.
Сёлета ў бібліятэчнай сістэме быў абвешчаны творчы конкурс “Суперчытач-2013”, вынікі якога былі падведзены на свяце, прымеркаваным да Дня бібліятэк.
З мэтай задавальнення інфармацыйных запатрабаванняў карыстальнікаў у афіцыйна-прававой інфармацыі ў ЦБС дзейнічаюць пяць публічных цэнтраў прававой інфармацыі, сем мультымедыйных і два інфармацыйна-адукацыйных. Цэнтральная бібліятэка абслугоўвае наведвальнікаў у аўтаматызаваным рэжыме і прадстаўляе магчымасць карыстацца інтэрнэт-класам.
Пра ўсе маючыя адбыцца і прайшоўшыя мерапрыемствы, новыя паступленні літаратуры, перыядычныя выданні аператыўна паведамляе асабісты сайт цэнтралізаванай бібліятэчнай сістэмы раёна. Плённая работа па раскрыцці фондаў праводзіцца як праз выставы, так і праз тэматычныя сустрэчы з чытачамі, у тым ліку і патэнцыяльнымі, якія папаўняюць спіс карыстальнікаў.
Застаецца толькі дадаць, што па выніках работы ў мінулым годзе Смаргонская ЦБС стала пераможцай абласнога агляду-конкурсу.
