Напрыканцы мая мне  пашчасціла  прыняць  удзел  у  беларуска-германскім  праекце –Тыдні  “Экалогія  без  межаў”, які  быў  прымеркаваны  да  25-й  гадавіны  катастрофы  на  Чарнобыльскай  АЭС.  Арганізатары  праекта  імкнуліся прадэманстраваць ашчаднае  стаўленне да энэргетычных  рэсурсаў  і  паказаць  магчымасці  адмаўлення   ад  ядзернай  энэргіі.

Мы  наведалі  экалагічную  станцыю  ў  Бергкамен-Хайль,   гаспадарку  па  вырошчванні  садавіны  і  агародніны, цэх  па  вытворчасці  энэргіі  з  драўніны,  ветрасілавую ўстаноўку… Мы  былі  ў  маленькіх  і  вялікіх  нямецкіх гарадах, вёсках і вёсачках, сустракаліся  з  вельмі  рознымі  людзьмі, атрымалі  масу  прыемных  уражанняў.  Нас  сустракалі  і  суправаджалі  на  працягу  ўсёй  паездкі  цудоўныя  людзі, якія  не  шкадавалі для беларусаў свайго часу, цеплыні і ўвагі.

Што найбольш уразіла? Не парадак і чысціня навокал - гэтага чакалі. Уразіла разнастайнасць дамоў і дворыкаў у мястэчку Бад-Зассэндорф: не сустрэлася ніводнага аднолькавага, усе розныя і ўсе прыгожыя! Тут мы жылі ў старажытным замку, які ў нашы дні скарыстоўваецца як гатэль.